مصنف، اداکار اور بھارتی فلم پروڈیوسر سلیم خان نے انکشاف کیا ہے کہ تینوں بیٹوں میں سب سے زیادہ ڈانٹ ان سے سلمان خان نے کھائی ہے۔
حال ہی میں بھارتی میڈیا کو دیے گئے ایک انٹرویو میں سلیم خان نے انکشاف کیا کہ تینوں بیٹوں کو مجھ سے ڈانٹ پڑی لیکن سلمان خان نے بڑا ہونے کے باوجود مجھ سے سب سے زیادہ ڈانٹ سنی۔
دوران گفتگو سلیم خان نے اپنے والد سے تعلق پر بات کرتے ہوئے کہا کہ’میرے والد بے حد سخت انسان تھے، میں ان سے بہت گھبراتاتھا، ان کے چمڑے کے جوتے کی آواز سن کر بھی خوفزدہ ہوجاتا تھا لیکن میں چاہتا تھا کہ میرے بچے میرے دوست بنیں‘۔
اگرچہ سلمان خان سلیم خان کے ایک فرمانبردار بیٹے کے طور پر جانا جاتا ہے لیکن سلیم خان نے ناراضگی میں سلمان خان سے مہینوں بات نہ کرنے کا انکشاف کیا ہے۔
سلیم خان کے مطابق’ ایک ایسا وقت بھی آیا جب ہم نے تقریباً 6 ماہ تک ایک دوسرے سے بات نہیں کی، اگر سلمان کبھی کوئی غلط کام کرے یا پھر کوئی ایسا کام کرے جو مجھے اچھا نہ لگے تو میں اس سے بات نہیں کرتا‘۔
سلیم خان نے بتایا کہ ’میں ناراض ہوکر کھڑکی کے پاس بیٹھ جاتا ہوں اور مجھ سے ملے بغیر گھر سے چپکے سے چلا جاتا ہے، بعد میں آکر مجھے سوری کرکے منالیتا ہے‘۔
واضح رہے کہ سلیم خان اور سلمیٰ خان کے تین بیٹے سلمان خان، سہیل خان اور ارباز خان ہیں، جوڑے کی ایک بیٹی الویرا خان اگنی ہوتری اور گود لی ہوئی ایک اور بیٹی ارپیتا خان ہے، مزید برآں سلیم خان نے 1981 میں اداکارہ ہیلن سے دوسری شادی کی تھی۔