ملک میں سونے کی فی تولہ قیمت ہزاروں روپے گر گئی۔ آل پاکستان جیمز اینڈ جیولرز ایسوسی ایشن سے معلوم ہوا ہے کہ ملک میں سونے کی فی تولہ قیمت میں آج 4 ہزار روپے کی بڑی کمی ہوئی ہے، جس کے بعد ملک میں ایک تولہ سونے کا نیا ریٹ 2 لاکھ 4 ہزار 500 روپے ہوگیا، اسی طرح 10 گرام سونے کی قیمت میں 3 ہزار 429 روپے کی کمی ریکارڈ کی گئی اور ملک میں 10 گرام سونے کی نئی قیمت 1 لاکھ 75ہزار 326 روپے ہوچکی ہے۔
ادھر ڈالر کی قیمت بھی 230 روپے تک گر جانے کی پیش گوئی کردی گئی، اس حوالے سے پاکستان تحریک انصاف سے تعلق رکھنے والے ماہر معاشیات مزمل اسلم نے ایکسپورٹرز اور دیگر لوگوں کو مشورہ دیا ہے کہ وہ اپنے پاس موجود ڈالر فوری طور پر بیچ دیں کیوں کہ انہیں موجودہ ریٹ سے اچھا ریٹ نہیں ملے گا۔
اپنے ایک بیان میں مزمل اسلم نے کہا کہ وہ لوگوں کو کچھ سمجھانا چاہتے ہیں، سب سے پہلے ایکسپورٹرز کے لیے جنہوں نے پیسے (باہر) روک کے رکھے ہوئے تھے اور پاکستان میں پیسے نہیں لا رہے تھے، میرا اپنا خیال ہے کہ بھائی ایکسپورٹرو، یہ جو 270 روپے ہے یہ آپ کے لیے لاٹری ہے اور اس لاٹری کو کیش کریں، کبھی کبھار ایسا ہوتا کہ انسان لالچ میں اپنی لاٹری کو کیش نہیں کرتا اور بعد میں پچھتاتا ہے، آپ پچھتائیں گے کیوں کہ اس سے اچھا ریٹ نہیں مل سکتا، آپ کو ڈھائی سو روپے سے اوپر نہیں ملنا چاہیے تھا لیکن کچھ ہماری اس حکومت کی نااہلیاں، غلطیاں اور اسحاق ڈار کی ضد کی وجہ سے یہ ہوگیا۔
مزمل اسلم نے کہا کہ اگر اسحاق ڈالر ٹھیک چلے تو ڈالر کا ریٹ 230 روپے پر بھی آسکتا ہے، اگر آپ ڈالر کو رکھتے ہیں تو آپ کو کیا ملے گا، ڈالر کی قیمت پانچ دس روپے بڑھے گی، اس سے زیادہ حکومت پاکستان آپ کو دے رہی ہے، اگر لوگ ڈالر بیچ کر رقم بینکوں میں رکھیں تو انہیں 15 فیصد منافع ملے گا، اس کے لیے اسلامک آپشن بھی ہیں اور نان اسلامک بھی، 15 فیصد کا مطلب ہے کہ سال بعد 270 روپے پر 40 روپے ملیں گے یعنی 270 جمع 40 ملا کر 310 جب کہ ڈالر کا ریٹ 310 نہیں ہوگا۔
پی ٹی آئی رہنما نے کہا کہ پاکستان کے زرمبادلہ کے ذخائر تو کم ہو کر ساڑھے تین ارب ڈالر ہو گئے ہیں لیکن اس سے کہیں زیادہ ڈالر ملک میں موجود ہیں، لوگوں کے لاکرز میں، ہاتھوں میں، کرنسی سرکولیشن کی شکل میں جب کہ لوگوں نے سونا بھی ضرورت سے بہت زیادہ منگوا لیا ہے، مارکیٹ کسی نہ کسی موقع پر خود کو درست کرتی ہے اور وہ لوگوں کے فائدے کی بات کر رہے ہیں۔