جمعہ سے ملک بھر میں بارشوں کی پیشگوئی

اسلام آباد: محکمہ موسمیات کی کل 13 جون سے ملک کے بیشتر علاقوں میں بارشوں کی پیشگوئی کر دی۔

محکمہ موسمیات کے مطابق 13 جون سے 16 جون کے دوران ملک کے مختلف علاقوں میں تیزہواؤں کے ساتھ بارشوں کا امکان ہے۔ کل سے مغربی ہواؤں کا سلسلہ بالائی علاقوں میں داخل ہونے کا امکان ہے۔

اسلام آباد، راولپنڈی، اٹک، چکوال، تلہ گنگ، میانوالی اور سرگودھا میں بارشیں متوقع ہیں۔ جبکہ حافظ آباد، منڈی بہاؤالدین، گوجرانوالہ، گجرات اور سیالکوٹ میں بھی بارش ہونے کا امکان ہے۔

پنجاب کے علاقوں لاہور، فیصل آباد، جھنگ، ٹوبہ ٹیک سنگھ میں بھی وقفے وقفے سے بارش ہو سکتی ہے۔

خیبر پختونخوا کے علاقوں پشاور، مردان، صوابی، نوشہرہ، چارسدہ سمیت مختلف علاقوں میں بارش کا امکان ہے۔

بلوچستان کے علاقوں بارکھان، موسیٰ خیل اور ژوب میں تیز ہواؤں کے ساتھ بارش ہو سکتی ہے۔ جبکہ بالائی سندھ کے تمام اضلاع میں گرج چمک کے ساتھ بارش متوقع ہے۔