بھارتی شہر احمد آباد میں مسافر بردار طیارہ گر کر تباہ ہو گیا ، جس کے نتیجے میں طیارے میں سوار 242 میں سے 241 افراد ہلاک ہو گئے۔ اور ایک شخص معجزانہ طور پر زندہ بچ گیا جبکہ طیارے حادثے میں ہلاکتیں 290 سے تجاوز کر گئیں۔
بھارتی میڈیا کے مطابق ریاست گجرات کے شہر احمد آباد ائیرپورٹ کے قریب مسافر طیارہ ڈاکٹروں کے ہاسٹل پر گر گیا ، طیارے میں عملے کے 12 ارکان سمیت 242 مسافر سوار تھے۔
احمد آباد پولیس کے مطابق طیارہ ڈاکٹروں کے ہاسٹل پر گرا تھا۔ اور طیارے میں سوار افراد کے علاوہ طیارے کی زد میں آکر بھی متعدد افراد ہلاک ہوگئے۔
ائیر انڈیا کا طیارہ احمد آباد ائیرپورٹ سے لندن جا رہا تھا کہ ٹیک آف کرنے کے بعد شہری علاقے میں گر گیا ، طیارے گرنے کے بعد دھوئیں کے بادل چھا گئے۔
فلائٹ ریڈار کے مطابق اڑان بھرنےکے بعد ایک منٹ سے بھی کم وقت میں625 فٹ کی بلندی پر طیارے سے رابطہ منقطع ہو گیا تھا۔
بھارتی میڈیا کے مطابق بھارتی ریاست گجرات کے سابق وزیر اعلیٰ وجے روپانی بھی طیارے میں سوار تھے۔ حادثے کی اطلاع ملتے ہی بھارتی وزیر اعظم نریندر مودی احمد آباد کے لیے روانہ ہو گئے۔
میڈیا رپورٹس کے مطابق طیارے میں 169 بھارتی، 53 برطانوی، 7 پرتگالی اور ایک کینیڈین شہری سوار تھا، برطانوی وزارت خارجہ کا کہنا ہے کہ بھارتی حکام سے مکمل رابطے میں ہیں۔
طیارہ گرنے کے بعد دہلی سے احمدآباد جانے والی 9 پروازیں منسوخ کر دی گئیں۔انتظامیہ نے ایئرپورٹ کے آس پاس کی تمام سڑکوں کو بند کر دیا۔ دوسری جانب ایئر انڈیا کا کہنا ہے کہ حادثے کی وجوہات کا جائزہ لیا جا رہا ہے۔