پاکستان اسٹیل ملز کے بر طرف ملازمین نے بن قاسم ریلوے ٹریک پر کئی گھنٹوں سے دھرنا دیا ہوا ہے جس کے باعث کراچی سے اندرون ملک جانے اور آنے والی ٹرین سروس معطل ہے۔
مظاہرین کا مطالبہ ہے کہ 6 ہزار ملازمین کو بحال کیا جائے، اسٹیل ٹاؤن میں بجلی گیس بحال کریں۔ ڈی ایس ریلویز کراچی ناصر خلیلی کے مطابق دوپہر 12:30 سے اسٹیل مل ملازمین نے ٹریک بند کیا ہوا ہے اور احتجاج کے باعث ٹرین کا آپریشن معطل ہے۔
انہوں نے کہا کہ ڈاؤن ٹریک پر ملت، گرین لائن، کراچی ایکسپریس اور شاہ حسین ٹرین رکی ہوئی ہیں اور اپ ٹریک پر رحمان بابا، علامہ اقبال ایکسپریس اور قراقرم ایکسپریس رکی ہوئی ہیں۔
ان کا کہنا تھاکہ مظاہرین ہم سے بات نہیں کر رہے، ہم نے ضلعی انتظامیہ سے بھی بات کرنے کی کوشش کی ہے اور اسٹیل مل انتظامیہ سے مذاکرات کیلئے رابطہ کررہے ہیں
دوسری جانب ڈپٹی کمشنر ملیر، ایس ایس پی ملیر کچھ دیر بعد مظاہرین کے وفد سے ملاقات کریں گے۔