ڈی آئی خان میں ایف سی کی گاڑی پر خارجیوں کی فائرنگ کے نتیجے میں 2اہلکار شہید ہوگئے۔
ترجمان وزارت داخلہ کے مطابق خوارج کی فائرنگ سے 4ایف سی اہلکار زخمی بھی ہوئے جنہیں اسپتال منتقل کردیا گیا ہے،شہدا میں سپاہی شیر الرحمان اور سپاہی سید امین شامل ہیں۔
سپاہی شیر الرحمان کا تعلق جنوبی وزیرستان او ر سپاہی سید امین کا تعلق صوابی سے ہے،زخمیوں میں حوالدار امتیاز،سپاہی محب شاہ،سپاہی صاحب دین اور سپاہی فضل کریم شامل ہیں۔
ترجمان نے اپنے بیان میں مزید کہا کہ ایف سی دہشت گردوں کے ناپاک عزائم کوخاک میں ملانے کیلئے پرعزم ہے،ایف سی جوانوں کی قربانیاں دہشتگردی کیخلاف جنگ میں پختہ عزم کی عکاس ہیں۔
دوسری جانب وزیرداخلہ محسن نقوی نے ڈی آئی خان میں ایف سی کے 2 اہلکاروں کی شہادت پر خراج عقیدت پیش کیا ،انہوں نے کہا شہید سپاہی شیر الرحمان اور سید امین شہید کی عظیم قربانی کو سلام پیش کرتے ہیں۔
ایف سی اہلکاروں نے جان کی قربانی دے کر دہشت گردوں کے عزائم کو خاک میں ملایا،شہدا کے خاندانوں کے ساتھ دلی ہمدردی اور تعزیت کا اظہار کرتے ہیں،ہماری تمام تر ہمدردیاں شہدا کے خاندانوں کے ساتھ ہیں۔
شہداء کے خاندانوں کو تنہا نہیں چھوڑیں گے ،زخمی سپاہیوں کی جلد صحت یابی کیلئے دعا گو ہیں،زخمی سپاہیوں کے علاج معالجے میں کوئی کسر اٹھانہ رکھی جائے گی۔
فرنٹیئر کانسٹیبلری کے بہادر جوانوں پر ناز ہے،ایف سی کے جوانوں کی قربانیاں ہمارے عزم کو مزید مضبوط کرتی ہیں۔