نومنتخب برطانوی وزیراعظم سرکئیر اسٹارمر نے عہدہ سنبھالتے ہی غیر قانونی تارکین کو روانڈا بھیجنے کا منصوبہ ختم کرنے کا اعلان کردیا۔
برطانوی میڈیا کے مطابق سرکئیر اسٹارمر نے عہدہ سنبھالنے کے بعد اپنی پہلی پریس کانفرنس میں اعلان کیا کہ روانڈا منصوبےکو ختم کردیا جائے گا کیونکہ اس سے صرف ایک فیصد غیر قانونی تارکین وطن کم ہوں گے۔
ان کا کہنا تھا کہ روانڈا منصوبہ شروع ہونے سے پہلے ہی مردہ اور دفن ہو چکا تھا۔
یاد رہے کہ سر کئیر اسٹارمر نے الیکشن سے قبل ہی واضح کیا تھا کہ وہ اقتدار میں آکر روانڈا منصوبے کو ختم کردیں گے۔ ان کا مؤقف تھا کہ سیاسی پناہ لینے میں ناکام افراد کو اسی ملک بھیجنا چاہیے جہاں سے وہ آئے تھے۔
برطانوی میڈیا کے مطابق اس منصوبے کے خاتمے سے برطانیہ کو اگلےسال اور 2026 میں 50 ملین یورو کی بچت ہوگی۔
روانڈا منصوبہ کیا ہے؟
اس منصوبے کے تحت برطانیہ میں پناہ کے متلاشی چند افراد کو روانڈا بھجوایا جانا تھا جہاں 5 سالہ معاہدے کے تحت ان کے دعوؤں کی جانچ پڑتال ہوتی کہ وہ کیوں اپنے ملک واپس نہیں جانا چاہتے۔
اگر ان افراد کے دعوے کامیاب ہوتے تو انہیں پناہ گزین کا درجہ دے کر واپس برطانیہ لاکر رہنے کی اجازت دے دی جاتی۔ بصورت دیگر پناہ کے متلاشی افراد روانڈا میں یا پھر کسی تیسرے محفوظ ملک میں پناہ حاصل کرنے کی درخواست دے سکتے تھے۔