کراچی: امیر جماعت اسلامی کراچی حافظ نعیم الرحمان نے شہر قائد کے عوام کیلیے انتخابی منشور کا اعلان کر دیا۔
پارٹی رہنماؤں کے ساتھ میڈیا سے گفتگو میں حافظ نعیم الرحمان نے کہا کہ جماعت اسلامی نے الیکشن کیلیے بھرپور ٹیم اتاری ہے جس میں ڈاکٹرز، وکلا اور انجینئرز شامل ہیں، منشور میں نعرہ ہے ”کراچی ترقی کرے گا تو پورا پاکستان ترقی کرے گا“۔
حافظ نعیم الرحمان نے کہا کہ 35 سال میں جن لوگوں کو کراچی نے مینڈیٹ دیا انہوں نے شہر تباہ کر دیا، کراچی کو اعزاز ہے کہ اگر کراچی ترقی کرے گا تو ملک ترقی کرے گا، جماعت اسلامی کا پہلا نقطہ ہی یہی ہے کہ کراچی میں گنتی پوری کی جائے۔
انہوں نے کہا کہ پیپلز پارٹی، متحدہ قومی موومنٹ اور مسلم لیگ (ن) نے آبادی کم کر کے کراچی کے عوام کی پیٹھ پر چھرا گھونپا، مینڈیٹ کے ساتھ جماعت اسلامی آئے گی تو کراچی کی گنتی پوری کروائے گی۔
ان کا کہنا تھا کہ آبادی درست ہونے کے نتیجے میں وسائل بھی آبادی کے لحاظ سے ملیں گے، سب سے پہلے سرکاری اسکول کو ماڈل اسکول بنائیں گے، نوجوانوں کیلیے تمام لیول پر فری آئی ٹی کی تعلیم دیں گے، اسکل ڈویلپمنٹ اداروں کو پہلے ٹاؤن اور پھر یوسی کی سطح پر لائیں گے۔
امیر جماعت اسلامی کراچی نے کہا کہ تمام ڈگری کالجز میں بی سی ایس پروگرام شروع کریں گے، کراچی کے نوجوانوں کا سرکاری ملازمتوں میں حصہ یقینی بنائیں گے، انہوں نے کہا کہ آئیں کے مطابق کراچی کو گیس کی فراہمی کو یقینی بنائیں گے۔