جے یو آئی (ف) کے ترجمان حافظ حمد اللہ نے کہا ہےکہ ریاستی ادارے، نگران حکومت اور الیکشن کمیشن مولانا فضل الرحمان کے تحفظات کو سنجیدگی سے لیں۔
جیونیوز کے پروگرام جیو پاکستان میں گفتگو کرتے ہوئے حافظ حمد اللہ نے کہا کہ مولانا فضل الرحمان باربار سکیورٹی خطرات، بے امنی اور موسم کی بات کرتے ہیں، موسم سرما میں بالائی علاقوں سے لوگ شہری علاقوں میں آتے ہیں، بےامنی، سکیورٹی خطرات ہوں اور لوگ گھروں سے نہ نکل سکیں تو ووٹ سے محروم ہوتے ہیں، اس لیے الیکشن سے متعلق سوالات اٹھیں تو بہتر ہے پر امن ماحول دیں۔
‘سردی کی وجہ سے پولنگ اسٹیشن بنا ہی نہ سکے تو یہ دھاندلی کی طرف راستہ کھولنے کے برابر ہوگا’
انہوں نے کہا کہ 8 فروری کو الیکشن سپریم کورٹ کا فیصلہ ہے، مولانا فضل الرحمان کا مطالبہ ہے ووٹر، شہریوں اور جے یوآئی قیادت کو سکیورٹی دیں۔
حافظ حمد اللہ کا کہنا تھا کہ اگر ملک کی بڑی سیاسی جماعتیں سنجیدہ نہیں لیتیں تو ان سے پوچھیں، ن لیگ اور پیپلزپارٹی کی قیادت سے پوچھیں، اگر خدانخواستہ کچھ ہوتا ہے تو یہی پارٹیاں سوال کریں گے لہٰذا ریاستی ادارے، نگران حکومت اور الیکشن کمیشن مولانا فضل الرحمان کے تحفظات کو سنجیدگی سے لیں۔