سونے کی قیمت میں ملکی تاریخ کی سب سے بڑی یومیہ کمی، 10 ہزار روپے سے زائد کمی سے سونے کی فی تولہ قیمت سوا 2 لاکھ روپے کی سطح سے نیچے آ گئی۔ تفصیلات کے مطابق صرف 2 دنوں میں پاکستان کی صرافہ مارکیٹوں میں سونے کی قیمت دیکھتے ہی دیکھتے زمین بوس ہو گئی۔ میڈیا رپورٹس کے مطابق عالمی مارکیٹ میں سونے کی قیمتوں میں کمی اور پاکستان کی اوپن مارکیٹ میں ڈالر کی قیمت کریش ہونے سے ملک میں بدھ کے روز سونے کی قیمت میں ملکی تاریخ کی سب سے بڑی یومیہ کمی ہوئی۔
بین الاقوامی مارکیٹ میں فی اونس سونے کی قیمت 5 ڈالر کمی کے ساتھ 1926 ڈالر ہوگئی جبکہ پاکستان میں فی تولہ سونے کی قیمت میں 10 ہزار 500 روپے اور فی 10 گرام سونے کی قیمت میں 9 ہزار 2 روپے کی ریکارڈ کمی واقع ہوئی۔
قیمتوں میں بڑی کمی کے باعث مقامی صرافہ بازاروں میں فی تولہ سونے کی قیمت سوا 2 لاکھ روپے کی سطح سے نیچے آ گئی، فی تولہ سونے کی قیمت 2 لاکھ 22 ہزار 300 روپے ہوگئی جبکہ فی دس گرام سونے کی قیمت ایک لاکھ 90 ہزار 586 روپے ہوگئی۔
واضح رہے کہ حالیہ چند ہفتوں کے دوران پاکستانی روپے کی قدر میں بدترین کمی کی وجہ سے سونے کی قیمت میں ہزاروں روپے اضافہ ہوا۔ گزشتہ 16 ماہ کے دوران سونے کی قیمت میں 100 فیصد سے زائد اضافہ ہو چکا ہے۔ دوسری جانب پاکستان کی انٹربینک اور اوپن مارکیٹوں میں پاکستانی روپیہ کیلئے بدھ کا دن کافی اچھا رہا۔ کاروباری ہفتے کے تیسرے روز انٹربینک میں ڈالر کی قیمت میں 12 پیسے کی کمی ریکارڈ کی گئی جس کے بعد انٹربینک میں ڈالر 306 روپے 98 پیسے پر بند ہوا ہے۔
جبکہ اوپن مارکیٹ میں روپے کی قدر مسلسل اضافے کے باعث ڈالر تیزی سے نیچے آرہاہے، اوپن مارکیٹ میں آج ڈالر کی قیمت میں 11 روپے کی بڑی کمی ریکارڈ کی گئی جس کے بعد اوپن مارکیٹ مین ڈالر 312 روپے کا ہوگیا ہے۔ واضح رہے کہ تین دن میں اوپن مارکیٹ میں امریکی ڈالر 21 روپے سستا ہو چکا ہے۔