By zakir shah 
میٹا کی زیر ملکیت میسجنگ ایپ واٹس ایپ کی جانب سے اپنی آئی او ایس اور میکس ایپس کے ’ زیرو کلک بگ‘ کو فکس کرنے کا اعلان کیا گیا ہے۔
اس سکیورٹی بگ کو "مخصوص ٹارگٹڈ صارفین” کے ایپل ڈیوائسز سے خفیہ طور پر ڈیٹا ہیک کرنے کے لیے استعمال کیا جا رہا تھا۔
واٹس ایپ کی جانب سے جاری سکیورٹی ایڈوائزری کے مطابق ’واٹس ایپ نے بگ CVE-2025-55177 کو ٹھیک کردیا ہے، ایپ میں موجود اس خامی کو ’مخصوص صارفین ‘ کے ایپل ڈیوائسز سے ڈیٹا ہیک کرنے کیلئے استعمال کیا گیا تھا‘۔
زیرو کلک بگ کیا ہے؟
زیرو کلک بگ کے تحت ہیکرز صارف کی کسی بھی کارروائی کے بغیر خفیہ طور پر اس کی ڈیوائسز پر قبضہ کرتے ہوئے اس کا ڈیٹا چوری کرلیتے ہیں، واٹس ایپ کے معاملے میں ہیکرز نے زیرو کلک بگ کے ذریعے ایپ میں موجود خامیوں کا فائدہ اٹھاتے ہوئے درجنوں مخصوص واٹس ایپ صارفین کو نشانہ بنایا۔
ایمنسٹی انٹرنیشنل سکیورٹی لیب کے سربراہ Donncha Ó Cearbhaillکی جانب سے اس حملے کو ایکس ( ٹوئٹر) پر”ایڈوانس اسپائی ویئر مہم” کے طور پر بیان کیا گیا تھا۔
سربراہ ایمنسٹی انٹرنیشنل سکیورٹی لیب نے اپنی ٹوئٹ میں بتایا تھا کہ گزشتہ 3 ماہ کے دوران زیرو کلک بگ کے ذریعے خفیہ طور پر درجنوں صارفین کو نشانہ بنایا گیا یعنی ہیکرز نے ہیکنگ کیلئے صارفین سے نہ کوئی بات چیت کی نہ ہی ان کے ڈیٹا کو چوری کرنے کیلئے کسی لنک کو کھولنے یا فائل ڈاؤن لوڈ کرنے کیلئے آمادہ کیا، تاہم ٹوئٹ میں ہیکرز کے حوالے سے کوئی معلومات شیئر نہیں کی گئیں۔
اب، میٹا کی ترجمان مارگریٹا فرینکلن نے تصدیق کی ہے کہ کمپنی نے "کچھ ہفتے پہلے” اس خامی کا پتہ لگانے کے بعد اس کو فکس کر دیا ہے، ساتھ ہی کمپنی کی جانب سے 200 سے کم متاثرہ واٹس ایپ صارفین کو اس حوالے سے باقاعدہ نوٹیفکیشن بھی بھیجی گئی۔