کلاؤڈ برسٹ یا بادل پھٹنے کا مطلب کیا ہے اور ایسا کیوں ہوتا ہے؟

کلاؤڈ برسٹ یا بادل پھٹنے کا مطلب کسی مخصوص علاقے میں اچانک بہت کم وقت میں گرج چمک کے ساتھ بہت زیادہ اور موسلادھار بارش کا ہونا ہے جس کے باعث سیلابی صورت حال پیدا ہو جائے۔

ایسا اس وقت ہوتا ہے جب زمین یا فضا میں موجود بادلوں کے نیچے سے گرم ہوا کی لہر اوپر کی جانب اٹھتی ہے اور بادل میں موجود بارش کے قطروں کو ساتھ لے جاتی ہے۔

اس صورت میں عام طریقے سے بارش نہیں ہوتی جبکہ بادلوں میں بخارات کے پانی بننے کا عمل بہت تیز ہو جاتا ہے کیونکہ بارش کے نئے قطرے بنتے ہیں اور پرانے قطرے اوپر واپس بادلوں میں پہنچ جاتے ہیں، جس کا نتیجہ طوفانی بارش کی شکل میں نکلتا ہے کیونکہ بادل اتنے پانی کا بوجھ برداشت نہیں کر پاتے۔

محکمہ موسمیات کے مطابق اگر کسی چھوٹے علاقے میں مختصر وقفے میں شدید بارش ہوجائے تو اسے کلاؤڈ برسٹ کہا جاتا ہے، اس کے لیے ضروری ہے کہ مخصوص علاقے میں ایک گھنٹے میں کم سے کم 200 ملی میٹر بارش ریکارڈ کی جائے۔

البتہ بھارتی محکمہ موسمیات کی تعریف مختلف ہے اور اس کے مطابق اگر 30 اسکوائر کلومیٹر میں ایک گھنٹے میں 100 ملی میٹر یا اس سے زائد بارش برس جائے تو اسے کلاؤڈ برسٹ کہا جاتا ہے۔

آسان الفاظ میں یہ عمل کچھ ایسا ہوتا ہے جیسے پانی کی بالٹی اچانک الٹ گئی ہو تو جب جس طرح پانی برق رفتاری سے بہتا ہے، ایسے ہی کلاؤڈ برسٹ میں پانی زمین پر برستا ہے۔