By zakir shah 
واٹس ایپ میں چیٹس کے لیے ایک بہترین فیچر کا اضافہ کیا گیا ہے۔
WaBetaInfo کی ایک رپورٹ میں بتایا گیا کہ میٹا کی زیر ملکیت میسجنگ ایپ میں ایک فیچر کو متعارف کرایا جا رہا ہے جس میں صارفین میسجز پر ریپلائی تھریڈ فارمیٹ میں کرسکیں گے۔
اس طرح کا فیچر سوشل میڈیا سائٹس جیسے فیس بک یا ایکس (ٹوئٹر) وغیرہ میں کمنٹس پر ریپلائیز کرتے ہوئے استعمال کرنے کا موقع ملتا ہے۔
مگر اب اسے واٹس ایپ کا حصہ بنایا جا رہا ہے تاکہ چیٹس کا تجربہ زیادہ آسان اور منظم ہوسکے۔
ابھی ہر میسج پر کیا جانے والا ریپلائی الگ پوسٹ ہوتا ہے تو کئی بار پرانے ریپلائیز کو تلاش کرنا مشکل ہو جاتا ہے۔
مگر اس فیچر کے تحت کسی گروپ چیٹ میں ریپلائیز ایک ہی جگہ اوریجنل میسج کے نیچے نظر آئیں گے جس سے گفتگو کا متن واضح ہوگا۔
واٹس ایپ کے نئے بیٹا (beta) ورژنز (اینڈرائیڈ اور آئی او ایس) میں اس فیچر کا عندیہ ملا ہے۔
رپورٹ میں بتایا گیا کہ اس فیچر کی بدولت صارفین کو پوری چیٹ ہسٹری میں کسی مخصوص میسج پر کیے جانے والے ریپلائیز کو دیکھنے کے لیے پوری چیٹ ہسٹری میں اسکرول کرنے کی ضرورت نہیں ہوگی۔
رپورٹ کے مطابق جب کوئی فرد کسی میسج پر ریپلائی کرے گا تو اوریجنل میسج پر ایک چھوٹا آئیکون نظر آئے گا۔
اس آئیکون پر کلک کرنے پر صارفین کے سامنے اس میسج پر کیے جانے والے تمام ریپلائیز آجائیں گے۔
صارفین اس میسج تھریڈ کے اندر براہ راست نئے ریپلائیز بھی سینڈ کرسکیں گے تاکہ کسی موضوع سے متعلق بات چیت کو ایک ہی جگہ تک محدود رکھا جاسکے۔
یہ فیچر بھی گروپ چیٹس کے لیے مددگار ثابت ہوگا جہاں میسجز کی تعداد بہت زیادہ ہوتی ہے اور انہیں ٹریک کرنا مشکل ہوتا ہے۔
جیسا اوپر درج کیا جاچکا ہے کہ ابھی اس فیچر کا اشارہ بیٹا ورژن میں ملا ہے تو ابھی یہ کہنا مشکل ہے کہ اسے کب تک تمام صارفین کے لیے متعارف کرایا جا سکتا ہے۔