By zakir shah 
لودھراں کے علاقہ گنگے والا میں واقع مدرسہ تفہیم القرآن میں فوڈ پوائزننگ کا افسوسناک واقعہ پیش آیا جہاں زہریلا یا مضر صحت کھانا کھانے سے 10 طلباء کی حالت غیر ہوگئی۔
متاثرہ بچوں کو ریسکیو 1122 نے فوری طور پر ڈسٹرکٹ ہیڈکوارٹر ہسپتال لودھراں منتقل کیا جہاں ایمرجنسی نافذ کردی گئی۔
ڈائریکٹر ایمرجنسی ڈاکٹر جہانزیب کے مطابق ابتدائی رپورٹ کے مطابق بچوں نے مضر صحت یا زہریلا کھانا کھایا، جس کی وجہ سے ان کی حالت خراب ہوئی جبکہ ایک بچے کی حالت تشویشناک ہونے کے باعث اسے بہاولپور منتقل کیا گیا ہے۔
انہوں نے بتایا کہ ہسپتال میں علاج کی تمام سہولیات میسر ہیں اور ڈاکٹرز متاثرہ بچوں کی دیکھ بھال میں مصروف ہیں۔
متاثرہ طلباء میں 10 سالہ ہنزہ، 9 سالہ احمد، 8 سالہ بلاول، 8 سالہ عثمان، 8 سالہ ایان، 13 سالہ ثناء اللہ، 12 سالہ زوہیب، 12 سالہ ارشد، 6 سالہ حمید اور 9 سالہ فراز شامل ہیں۔
تمام بچے حفظ قرآن کی تعلیم حاصل کر رہے ہیں اور ان کا تعلق لودھراں، احمد پور اور ملحقہ علاقوں سے ہے۔
ڈی پی او لودھراں علی بن طارق واقعے کی اطلاع ملتے ہی ہسپتال پہنچ گئے اور صورتحال کا جائزہ لیا۔
انہوں نے کہا کہ واقعے کی مکمل چھان بین کی جائے گی اور بچوں کی صحت کو اولین ترجیح دی جائے گی۔
امیر جماعت اسلامی ڈاکٹر طاہر چوہدری نے بتایا کہ مدرسے میں طلباء کو روزانہ تازہ ناشتہ فراہم کیا جاتا ہے۔
انہوں نے واقعے پر افسوس کا اظہار کرتے ہوئے کہا کہ اس کی مکمل تحقیقات کی جائیں گی۔
Asad ali