By zakir shah 
سینیٹر سلیم مانڈوی والا کی زیرصدارت سینیٹ کی قائمہ کمیٹی خزانہ کا اجلاس ہوا جہاں فیڈرل بورڈ آف ریوینیو ( ایف بی آر )کے ممبر حامد عتیق سرور نے انکشاف کیاکہ بھارت نے ایک دن میں ایف بی آر پر ایک ہزار 684 سائبر حملے کیے۔
حامد عتیق سرور نے اجلاس کے دوران بتایا کہ بھارت کی پوری کوشش کے باوجود ایف بی آر کا سسٹم نہ بیٹھا نہ کوئی ڈیٹا لیک ہوا، انہوں نے یقین دلایا کہ ٹیکس دہندہ کا ڈیٹا ایف بی آر کے پاس مکمل محفوظ ہے۔
ایف بی آر کے ممبر حامد عتیق سرور نےکہاکہ کسی ٹیکس دہندہ کو تنگ نہیں کیا جائےگا، ٹیکس دہندہ کو تنگ کرنےمیں ملوث افسران کیخلاف کارروائی ہو گی۔
اجلاس میں وزیر مملکت بلال اظہر کیانی نے کہاکہ کاروباری برادری کے ساتھ مذاکرات جاری ہیں اور ان کے مسائل کو حل کیا جا رہا ہے، ان کاکہنا تھا کہ حکومت آئی ایم ایف پروگرام میں ہونے کی وجہ سے بعض معاملات کی تفصیلات نہیں بتا سکتی۔
انہوں نے بتایا کہ ٹیکس دہندہ کو نہ ہراساں کیا جائے گا اور نہ اس کی اجازت دی جائے گی۔
اجلاس میں فلائنگ انوائسنگ پر بھی غور کیا گیا جہاں ایف بی آر کے ممبر حامد عتیق نے انکشاف کیاکہ گزشتہ مالی سال کے دوران 857 ارب روپے جبکہ دو ہزار 23-24 میں ایک ہزار 313 ارب روپے کی فلائنگ انوائسنگ پکڑی جا چکی ہیں۔
Asad ali