By Asad ali 
جمعیت علمائے اسلام (جے یو آئی) کے سربراہ مولانا فضل الرحمان نے مذہبی جماعتوں کے اتحاد متحدہ مجلس عمل (ایم ایم اے) کو دوبارہ فعال کرنے کی کوششیں شروع کردیں۔
مولانا فضل الرحمان نے غیر فعال متحدہ مجلس عمل کے رہنماؤں سے رابطے کیے ہیں اور انہوں نے متحدہ مجلس عمل کے رہنماؤں کو اپنی رہائش گاہ پر مدعو کرلیا۔
ذرائع کے مطابق علامہ سید ساجد علی نقوی وفد کے ہمراہ مولانا فضل الرحمان کی رہائش گاہ پہنچے، مولانا فضل الرحمان نے علامہ ساجد نقوی سمیت ایم ایم اے کی سابقہ قیادت کو مدعو کیا تھا۔
ذرائع نے بتایاکہ رابطے غیر فعال ایم ایم اے کو پھر سیاسی میدان میں اتارنے کی کاوشوں کا حصہ ہیں۔
ذرائع کا کہنا ہے کہ مولانا فضل الرحمان کے سربراہ جمعیت اہلحدیث حافظ عبد الکریم اور مولانا اویس نورانی سے بھی ٹیلیفونک رابطے کیے اور انہیں اپنی رہائش گاہ پر مدعو کرلیا۔
ذرائع کے مطابق جے یو آئی کی طرف سے تاحال جماعت اسلامی کو مدعو نہیں کیا گیا۔
ذرائع کا کہنا ہے کہ متحدہ مجلس عمل کی فعالیت، غیرفعالیت کے اسباب سمیت دیگر امور زیر غور آئیں گے، ملاقاتوں میں مجموعی سیاسی صورتحال سمیت غزہ اور خطےکی صورتحال بھی زیر غور آئے گی۔
خیال رہے کہ متحدہ مجلس عمل 6 مذہبی جماعتوں پر مشتمل اتحاد تھا جو 2002 میں بنایا گیاتھا۔
zakir shah