مسلم لیگ ن کی جے یو آئی کو خیبرپختونخوا میں سینیٹ الیکشن مل کر لڑنے کی پیشکش

رانا ثناء اللہ کی سربراہی میں حکومتی وفد کی مولانا فضل الرحمان سے ملاقات کی اندرونی کہانی سامنے آ گئی۔ مسلم لیگ ن نے جے یو آئی کو خیبرپختونخوا میں سینیٹ الیکشن مل کر لڑنے کی پیشکش کر دی ۔ مولانا فضل الرحمان نے پیپلزپارٹی سے بھی مشاورت کا مشورہ دیا اور حکومتی تجویز پارلیمانی پارٹی کے سامنے رکھنے کی  یقین دہانی کرا دی۔

مسلم لیگ ن کےوفد کی مولانافضل الرحمان سے ملاقات کا ایجنڈا خیبرپختونخوا سے سینیٹ کی نشستوں پر انتخابی اتحاد تھا ۔ رانا ثناءاللہ نے جے یو آئی سربراہ کو مل کر سینیٹ الیکشن لڑنے کی پیشکش کی۔ ن لیگ کا مؤقف تھا کہ اگر ہم مل کر الیکشن لڑیں تو زیادہ نشستیں نکال سکتے ہیں۔

ذرائع کے مطابق مولانا فضل الرحمان نے مسلم لیگ ن کی پیش کش کا مثبت جواب دیا اور کہا کہ آپ کی تجویز سر آنکھوں پر مگر پیپلزپارٹی کو بھی ساتھ ملانا زیادہ بہتر ہوگا۔ رانا ثناء اللہ نے جواب دیا ہم پی پی پی سے بھی بات کر رہے ہیں لیکن پہلے آپ کو اعتماد میں لینا ضروری تھا ۔ فضل الرحمان نے یقین دہانی کروائی کہ وہ حکومتی تجویز جی یو آئی کی پارلیمانی پارٹی کے سامنے رکھیں گے ۔

ذرائع کا کہنا ہےکہ مسلم لیگ ن کا وفد آئندہ چند روز میں پیپلزپارٹی سے بھی ملاقات کرے گا اگر پی پی پی آمادہ ہوئی تو تینوں جماعتیں مل کر خیبرپختونخوا اسمبلی میں سینیٹ الیکشن لڑیں گی ۔ حکمران جماعت اس معاملے پر عوامی نیشنل پارٹی کو بھی اعتماد میں لے گی۔