By zakir shah 
وزارت مذہبی امور کے مطابق آئندہ سال 2026ء کے حج کے لیے لازمی رجسٹریشن میں ایک روز باقی ہے ، اب تک 2 لاکھ سے زائد عازمین نے رجسٹریشن مکمل کرالی ہے، جبکہ بدھ 9 جولائی کو رجسٹریشن کی آخری تاریخ مقرر کی گئی ہے۔
ترجمان نے واضح کیا ہے کہ حج رجسٹریشن کے لیے کوئی فیس نہیں لی جا رہی اور یہ عمل ملک بھر کے 15 نامزد بینکوں میں جاری ہے۔ اس کے علاوہ عازمین گھر بیٹھے آن لائن بھی رجسٹریشن کرا سکتے ہیں۔
وزارت کے مطابق رجسٹریشن لازمی ہے، اور صرف وہی افراد حج کے اہل تصور ہوں گے جنہوں نے مقررہ وقت میں اپنی درخواست جمع کروائی ہوگی۔ رجسٹریشن کے بعد درخواست گزار سرکاری یا نجی حج اسکیم کا انتخاب کر سکیں گے۔
وزارت مذہبی امور نے یہ بھی بتایا کہ حج رجسٹریشن سعودی حکومت کی ہدایات کی روشنی میں کی جا رہی ہے۔ رجسٹریشن کے مکمل اعداد و شمار سعودی حکام کو فراہم کیے جائیں گے، جس کی بنیاد پر پاکستان کے لیے حج کوٹہ مختص کیا جائے گا۔