By zakir shah 
اوٹاوا: کینیڈا نے فلسطین کے دو ریاستی حل کے لیے کوششیں تیز تر کرنے کا اعلان کیا ہے۔
کینیڈا کے وزیراعظم مارک کارنے نے مغربی کنارے اور غزہ کی علاقائی سالمیت پر بیان دیتے ہوئے اسرائیل نے علاقائی سالمیت کا احترام کرنے کا مطالبہ کیا ہے۔
وزیراعظم مارک کارنے نے کہا کہ کینیڈا فلسطین کے دو ریاستی حل کے لیے ہر فورم پر تیز تر کوششیں کرے گا، اگلے ہفتے دو ریاستی حل کے لیے اقوام متحدہ کی کانفرنس میں شرکت کریں گے۔
کینیڈین وزیراعظم کا کہنا ہے کہ اسرائیل غزہ میں کھانے سے محروم بچوں کے لیے کینیڈا کی امداد روک رہا ہے، انسانی المیے پر قابو میں ناکامی پر اسرائیل کی مذمت کرتے ہیں۔
دوسری جانب اسرائیلی پارلیمنٹ نے ایک اور متنازع قدم اٹھاتے ہوئے فلسطین کے مغربی کنارے پر قبضے کی قرارداد منظور کر لی ہے۔
ادھر اسرائیلی دارالحکومت تل ابیب میں ایک بار پھر ہزاروں کی تعداد میں مظاہرین نیتن یاہو کے خلاف سڑکوں پر آگئے اور عوام نے حکومت سے غزہ میں جنگ بندی کرنے، قیدیوں کو واپس لانے اور فلسطینیوں کو خوراک کی فراہمی یقینی بنانے کا مطالبہ کیا۔
Asad ali