جان لیوا امراض قلب اور کینسر سے بچنے کیلئے روزانہ کتنے قدم چلنا چاہیے؟

ایسا کہا جاتا ہے کہ روزانہ 10 ہزار قدم چلنے سے امراض قلب، ذیابیطس ٹائپ 2 اور دیگر بیماریوں کا خطرہ کم ہوتا ہے۔

مگر بیشتر افراد کے لیے اتنے زیادہ قدم چلنا آسان نہیں ہوتا جو کہ لگ بھگ 5 میل چہل قدمی کرنے کے برابر ہے۔

تو اچھی خبر یہ ہے کہ آپ کو اچھی صحت کے لیے روزانہ 10 ہزار قدم چلنے کی ضرورت نہیں بلکہ کچھ کم چلنے سے بھی صحت کو بہت زیادہ بہتر بناسکتے ہیں۔

یہ بات آسٹریلیا میں ہونے والی ایک طبی تحقیق میں سامنے آئی۔

سڈنی یونیورسٹی کی تحقیق میں بتایا گیا کہ جب بھی ممکن ہو تو روزانہ 7 ہزار قدم چلنے کی کوشش کریں۔

اس تحقیق میں ایسی 31 مختلف تحقیقی رپورٹس کا تجزیہ کیا گیا جن میں دیکھا گیا تھا کہ روزانہ کتنے قدم چلنے سے مختلف دائمی امراض جیسے ذیابیطس ٹائپ 2، ڈیمینشیا، کینسر، ڈپریشن، امراض قلب اور قبل از وقت موت کا خطرہ کم ہوتا ہے۔

تحقیق میں روزانہ 2 ہزار قدم چلنے والے افراد کے ڈیٹا کا موازنہ زیادہ چلنے والے لوگوں سے کیا گیا۔

تحقیق میں دریافت کیا گیا کہ جو افراد روزانہ 7 ہزار قدم چلنے کے عادی ہوتے ہیں، ان میں کسی بھی وجہ سے جلد موت کا خطرہ 47 فیصد تک کم ہو جاتا ہے۔

تحقیق میں مزید دریافت کیا گیا کہ زیادہ متحرک افراد میں امراض قلب کا خطرہ 25 فیصد جبکہ ڈیمینشیا کا خطرہ 38 فیصد تک گھٹ جاتا ہے۔

محققین نے بتایا کہ روزانہ 7 ہزار قدم سے زیادہ چلنے سے کوئی نقصان نہیں ہوتا بلکہ اضافی فائدہ ہی ہوتا ہے، مگر جو افراد زیادہ چلنا پسند نہیں کرتے ان کے لیے 10 ہزار کے مقابلے 7 ہزار قدم کا ہدف زیادہ آسان ثابت ہوگا۔

انہوں نے کہا کہ قدموں کی تعداد صحت کے بارے میں جاننے کا بھی اچھا پیمانہ ہے کیونکہ اس سے اندازہ ہوتا ہے کہ آپ جسمانی طور پر کتنے فٹ ہیں۔

ان کا کہنا تھا کہ زیادہ اچھی بات یہ ہے کہ چلنے پھرنے کے لیے آپ کو کسی جم میں جانے کی ضرورت نہیں، بس گھر میں چہل قدمی کریں، باہر نکل کر اردگرد کے مناظر کو دیکھیں۔

اس تحقیق کے نتائج جرنل دی لانسیٹ پبلک ہیلتھ میں شائع ہوئے۔