By zakir shah 
سردرد ایک بہت عام مسئلہ ہے خاص طور پر آدھے سر کا درد یا مائیگرین۔
سردرد کے نتیجے میں روزمرہ کی سرگرمیاں بری طرح متاثر ہوتی ہیں، مائیگرین کا تو ابھی کوئی علاج بھی موجود نہیں۔
اس تکلیف کے ساتھ کچھ بھی کرنا بہت مشکل ثابت ہوتا ہے اور کسی کو معلوم نہیں کہ اس کا سامنا کب ہو جائے۔
مگر غذائیں اس حوالے سے مددگار ثابت ہوسکتی ہیں کیونکہ آپ جو بھی کھاتے ہیں وہ سر درد یا مائیگرین کی شدت میں کمی لانے میں مدد فراہم کرتا ہے۔
تو ایسی غذاؤں کے بارے میں جانیں جو سر درد یا مائیگرین سے ریلیف دلانے یا ان سے محفوظ رکھنے میں مدد فراہم کرتی ہیں۔
اومیگا 3 فیٹی ایسڈز سے بھرپور غذائیں
ماہرین کے مطابق اومیگا 3 فیٹی ایسڈز سے بھرپور غذائیں ورم کش ہوتی ہیں جن سے جسم میں ورم گھٹ جاتا ہے۔
ایک تحقیق میں دریافت کیا گیا کہ جسمانی ورم مائیگرین کا شکار بنانے میں کردار ادا کرتا ہے اور اومیگا 3 فیٹی ایسڈز سے آدھے سر کے درد کے دورانیے یا شدت میں کمی لانے میں مدد ملتی ہے۔
اومیگا 3 فیٹی ایسڈز کا حصول السی کے بیج، اخروٹ اور مچھلی سے ممکن ہوتا ہے۔
میگنیشم سے بھرپور غذائیں
طبی ماہرین کے مطابق میگنیشم ایسا غذائی جز ہے جو آدھے سر کے درد سے بچانے میں مدد فراہم کرسکتا ہے۔
ایک تحقیق میں جسم میں میگنیشم کی کمی اور مائیگرین سے متاثر ہونے کے درمیان تعلق دریافت کیا گیا۔
ماہرین نے مزید بتایا کہ میگنیشم سے بھرپور غذائیں جیسے پالک، گوبھی، کدو کے بیج یا دیگر کا استعمال اس مسئلے سے بچانے میں مدد فراہم کرسکتا ہے۔
ادرک
تحقیقی رپورٹس سے ثابت ہوا ہےکہ ادرک کے استعمال سے متلی کی شدت میں کمی آتی ہے جبکہ ورم بھی گھٹ جاتا ہے۔
اکثر جسمانی ورم مائیگرین کا شکار بناتا ہے۔
ایک تحقیق میں دریافت کیا گیا کہ ادرک کے پاؤڈر کو مائیگرین کے مریضوں کے علاج کے لیے استعمال کیا جاسکتا ہے۔
اسی طرح ادرک کی چائے بھی فائدہ مند ثابت ہوسکتی ہے کیونکہ ڈی ہائیڈریشن سے مائیگرین کی شدت بدتر ہو جاتی ہے۔
گریاں اور بیج بھی مفید
ماہرین کے مطابق گریوں اور بیجوں بشمول بادام، کدو کے بیج، سورج مکھی کے بیج اور اخروٹ وغیرہ کا استعمال بھی سردرد یا مائیگرین سے تحفظ فراہم کرسکتا ہے۔
گریوں اور بیجوں میں وٹامن ای اور میگنیشم سمیت متعدد ایسے غذائی اجزا موجود ہوتے ہیں جو سر درد سے تحفظ فراہم کرنے کے لیے اہم تصور کیے جاتے ہیں۔
دار چینی
دار چینی میں اینٹی آکسائیڈنٹس کی مقدار کافی زیادہ ہوتی ہے جس سے بھی سردرد کی شدت میں کمی آتی ہے۔
چائے میں اس کی تھوڑی سی مقدار استعمال کرکے پینے سے یہ فائدہ ہوسکتا ہے۔
تحقیقی رپورٹس سے عندیہ ملا ہے کہ دار چینی کے سپلیمنٹس سے جسمانی ورم میں کمی آتی ہے جبکہ مائیگرین کی شدت اور دورانیہ بھی گھٹ جاتا ہے۔
وٹامن بی 2 سے بھرپور غذائیں
وٹامن بی 2 سے بھرپور غذائیں جسم میں اس طرح کام کرتی ہیں جس سے مائیگرین کی روک تھام میں مدد ملتی ہے۔
انڈوں، دودھ یا اس سے بنی مصنوعات یا چربی سے پاک گوشت کے استعمال سے یہ غذائی جز جسم کا حصہ بنتا ہے۔
ہلدی میں اینٹی آکسائیڈنٹس کی مقدار کافی زیادہ ہوتی ہے اور اگر اسے اومیگا 3 فیٹی ایسڈز سے بھرپور غذاؤں کے ساتھ استعمال کیا جائے تو سر درد یا مائیگرین سے بچنے میں مدد ملتی ہے۔
سالم اناج
براؤن چاول اور جو وغیرہ کے استعمال سے بھی سردرد یا مائیگرین سے بچنے میں مدد مل سکتی ہے۔
تحقیقی رپورٹس میں دریافت کیا گیا کہ سالم اناج کے استعمال سے جسم میں گلوکوز کا اخراج مستحکم انداز سے ہوتا ہے جس سے بلڈ شوگر کی سطح تیزی سے اوپر نیچے نہیں ہوتی۔
بلڈ شوگر کی سطح جب بہت تیزی سے اوپر یا نیچے ہوتی ہے تو اس سے سر درد متحرک ہوتا ہے۔
سالم اناج میں فائبر، بی وٹامنز اور دیگر اجزا بھی موجود ہوتے ہیں جو سر درد یا مائیگرین سے تحفظ فراہم کرتے ہیں۔
پانی سے بھرپور غذائیں
پانی سے بھرپور غذائیں جیسے تربوز، کھیرے یا دیگر پھلوں کا استعمال بھی اس حوالے سے مددگار ثابت ہوسکتا ہے۔
اکثر جسم میں پانی کی کمی سے سر درد متحرک ہوتا ہے تو مناسب مقدار میں پانی کے استعمال سے سر درد یا مائیگرین سے بچنے میں مدد ملتی ہے۔
نوٹ: یہ مضمون طبی جریدوں میں شائع تفصیلات پر مبنی ہے، قارئین اس حوالے سے اپنے معالج سے بھی ضرور مشورہ کریں۔
Asad ali