By Asad ali 
بلوچستان بورڈ آف انٹرمیڈیٹ اینڈ سیکنڈری ایجوکیشن میں جعلی اسناد بنانے اور ریکارڈ ٹیمپرنگ کرنے کا انکشاف ہوا ہے۔
جیو نیوز سے گفتگو میں ڈائریکٹر جنرل اینٹی کرپشن بلوچستان عبدالواحد کاکڑ نے بتایا کہ ضلع واشک کے طالب علم سعید احمد نے بورڈ اہلکاروں کی ملی بھگت سے ایف ایس سی کے جعلی مارکس شیٹ حاصل کرکے بولان میڈیکل کالج کوئٹہ میں داخلہ لیا۔
انہوں نے کہا کہ اس طالب علم کے خلاف بلوچستان ہائی کورٹ نے اینٹی کرپشن کو جعل سازی کی کارروائی کا حکم دیا۔
ان کا کہنا تھاکہ محکمہ اینٹی کرپشن نے اپنی تحقیقات کیں تو بلوچستان بورڈ میں جعلی اسناد بنانے اور ریکارڈ ٹیمپرنگ کرنے کا انکشاف ہوا اور تحقیقات سے ثابت ہوا کہ طالب علم سعید کے اصل مارکس شیٹ میں نمبر کم تھے تاہم اس نے بورڈ اہلکاروں کی ملی بھگت سے جعلی مارکس شیٹ پر میڈیکل کالج میں داخلہ لیا۔
محکمہ اینٹی کرپشن بلوچستان بورڈ کے ایڈیشنل کنڑولر نور احمد، ڈپٹی کنٹرولر منور حسین سمیت پانچ اہلکار وں اور طالب علم سعید احمد کو مقدمہ درج کرکے گرفتار کرلیا۔
ڈی جی اینٹی کرپشن کا کہنا تھا کہ اس کیس میں مزید گرفتاریاں متوقع ہیں۔
Bahram 
Jalil