By Asad ali 
بلوچستان کے ضلع قلعہ عبداللہ میں 2 قبائل میں جھگڑے کے دوران فائرنگ سے 5 افراد جاں بحق اور متعدد افراد زخمی ہوگئے۔
بلوچستان کے ضلع قلعہ عبداللہ میں معمولی تکرار پر 2 قبیلوں میں خونی تصادم شروع ہوگیا، کاکوزئی اور بدوان قبائل کے درمیان فائرنگ کا سلسلہ جاری ہے، متحارب فریق ایک دوسرے پر جدید بڑے چھوٹے ہتھیاروں کا آزادانہ استعمال کر رہے ہیں، اب تک کی اطلاعات کے مطابق تصادم میں 5 افراد جاں بحق جبکہ متعدد افراد زخمی ہوئے ہیں۔
لیویز ذرائع نے بتایا کہ دونوں قبائل کے درمیان مسلح تصادم کا واقعہ ذاتی چپقلش کا نتیجہ ہے، واقعے کے بعد علاقے میں صورتحال انتہائی کشیدہ ہے۔
لیویز ذرائع کے مطابق خونی تصادم میں مزید ہلاکتوں کا بھی خدشہ ہے، دو طرفہ فائرنگ کے نتیجے میں جاں بحق اور زخمی افراد کو سول ہسپتال چمن اور قلعہ عبداللہ منتقل کیا جارہا ہے۔
ذرائع کے مطابق صورتحال پر قابو پانے کے لیے علاقے میں ایمرجنسی نافذ کر دی گئی ہے، قبائل کے درمیان لڑائی کے بعد کوئٹہ چمن شاہراہ سمیت دیگر اہم شاہراؤں پر ٹریفک کی آمدورفت بھی عارضی طور پر معطل ہو گئی ہے۔
لیویز ذرائع نے مزید بتایا کہ ایف سی، لیویز اور پولیس کی بھاری نفری نےعلاقے کو گھیرے میں لے لیا ہے تاہم کاکوزئی اور بدوان قبائل کے درمیان فائرنگ کا سلسلہ اب بھی جاری ہے۔
zakir shah