ہر حکومت کو اظہار رائے زہر لگتا ہے، آزادی اظہار کا حق سب کو ہے، وزیراعظم

نگراں وزیراعظم انوار الحق کاکڑ نے کہا ہے کہ ملک میں آزادی اظہار کا حق سب کو ہے، جو حکومت آتی ہے اسے اظہارِ رائے زہر لگتا ہے۔

ان خیالات کا اظہار انہوں نے کراچی کی آغا خان یونیورسٹی میں طلبہ کے سوالات کا جوابات دیتے ہوئے کیا۔ انہوں نے کہا کہ تعلیمی ادارے ہمیشہ میرے دل کے قریب رہے ہیں، طلبہ سے گفتگوکرکے خوشی ہورہی ہے۔

ایک سوال کے جواب میں انوار الحق کاکڑ کا کہنا تھا کہ گلگت بلتستان پاکستان کا حصہ ہے اور رہے گا۔ گلگت بلتستان جغرافیائی لحاظ سے اہم علاقہ ہے، اصل معاملہ گلگت بلتستان کی حیثیت سے متعلق ہے۔

نگراں وزیراعظم نے کہا کہ 1947 ایکٹ کے تحت ریاستوں کو پاکستان یا بھارت کے ساتھ الحاق کاحق دیا گیا تھا۔ گلگت بلتستان کے لوگوں نے پاکستان کے ساتھ الحاق کا فیصلہ کیا، ہم بھارت سے 3 جنگیں لڑ چکے ہیں۔